اسلام آباد (نیوز ڈیسک)الیکشن کمیشن آف پاکستان اور پنجاب حکومت کے درمیان بلدیاتی انتخابات کے انعقاد کے حوالے سے اتفاق ہوگیا ہے،
جس کے بعد انتخابات کے لیے مجوزہ مدت بھی سامنے آگئی ہے۔
الیکشن کمیشن کی جانب سے جاری اعلامیے کے مطابق پنجاب میں بلدیاتی انتخابات مرحلہ وار کرائے جائیں گے۔ یہ انتخابی عمل 15 دسمبر 2026 سے شروع ہوکر 15 جنوری 2027 تک مکمل کیا جائے گا۔
اعلامیے میں بتایا گیا ہے کہ پنجاب کے بلدیاتی انتخابات سے متعلق الیکشن کمیشن کے اجلاس میں صوبے میں انتخابات کے انعقاد کے طریقہ کار اور مجوزہ تاریخوں پر غور کیا گیا۔
اجلاس کے دوران چیف سیکریٹری پنجاب نے الیکشن کمیشن کو صوبائی حکومت کے منصوبے سے آگاہ کیا۔ ان کا کہنا تھا کہ حکومت چاہتی ہے کہ بلدیاتی انتخابات مقررہ مدت کے دوران مختلف مراحل میں منعقد کیے جائیں۔
چیف سیکریٹری کے مطابق مرحلہ وار پولنگ کرانے کا مقصد انتخابی عمل کے لیے مناسب سیکیورٹی انتظامات کو یقینی بنانا اور انتخابات کو بہتر انداز میں مکمل کرنا ہے۔
الیکشن کمیشن اور پنجاب حکومت کے درمیان ہونے والے اتفاق کے بعد پنجاب میں بلدیاتی انتخابات کے شیڈول کے حوالے سے اہم پیش رفت سامنے آگئی ہے۔
