ممبئی (نیوز ڈیسک ) بالی ووڈ اداکار سلمان خان نے کہا ہے کہ میں نے بالی ووڈ میں کئی سال گزارے ہیں اور بہت کچھ سیکھا ہے اب دوستی کے نام پر مزید فلمیں نہیں کرونگا۔ ایک انٹرویو میں سلمان خان نے کہا کہ بالی ووڈ میں 27 سال گزارنے کے بعد میں اپنے کیرئیر کے اس مقام پر آچکا ہوں جہاں فلموں میں کام دوسروں کو خوش کرنے کےلئے نہیں کرونگا۔ انہوں نے کہا کہ میرے پاس فلموں میں کام کرنے کا وقت ہوتا تو ہر دوسری فلم کرنے کیلئے رضا مندی کا اظہار کردیتا اور سوچتا کہ انکار کرنے سے دوستی میں مسائل پیدا ہوسکتے ہیں۔ سلمان خان نے بالی وڈ میں ’پریم‘ نام کے رومانوی کردار سے آغاز کیا تھا جس کے بعد انہوں نے اپنی پہنچان ایک ایکشن ہیرو کی بنالی۔ اپنی فلموں کے حوالے سے سلمان نے کہا کہ اب میں ایسی فلموں میں کام کرنا چاہتا ہوں جو دیکھنے والوں کو ایک بہتر انسان بناسکیں۔ سلمان کے مطابق وہ کئی سالوں سے ایکشن فلموں میں کام کر رہے ہیں جس کے بعد فلم ’پریم رتن دھان پایو‘ میں رومانوی کردار ادا کرکے انہیں کافی خوشی محسوس ہوئی اور وہ مزید اس طرح کی فلموں میں کام کرنے کا ارادہ رکھتے ہیں۔