بھونیشور(نیوز ڈیسک)بھارت کی شمال مشرقی ریاست بہار میں ہونے والے اسمبلی انتخابات کے بیشتر رجحانات آ چکے ہیں جس میں وسیع اتحاد کو واضح اکثریت حاصل ہے۔اس دوران بی جے پی نے شکست تسلیم کرتے ہوئے بہار کے وزیر اعلی نتیش کمار کو مبارکباد دی ہے۔بہار میں ووٹوں کی گنتی صبح آٹھ بجے شروع ہوئی تھی۔بہار کے وزیر اعلی نتیش کمار نے ایک ٹویٹ میں بہار کے لوگوں کا زبردست حمایت کے لیے شکریہ ادا کیا ہے۔انھوں نے لکھا: ’ہم آپ کی زبردست حمایت کا شکریہ ادا کرتے ہیں۔ ہم اپنی فتح میں باوقار رہیں گے۔‘جبکہ کانگریس رہنما احمد پٹیل نے کہا: ’بہار کی قیادت اور کارکنوں کو مبارک باد، راشٹریہ جنتا دل اور جنتا دل یونائٹیڈ کو بھی۔ سب نے محنت کی اور این ڈی اے کے جھوٹے دعووں کو شکست دے دی۔‘جے ڈی یو کے سرکردہ رہنما شرد یادو کا کہنا ہے کہ یہ جیت عوام میں پائی جانے والی بے چینی کی جیت ہے۔