اسلام آباد (آن لائن) چیئرمین نیب نے ڈائریکٹر جنرل نیب کو ہدایت کی ہے کہ وزیر اعظم نواز شریف اور وزیر اعلی شہباز شریف کے خلاف کرپشن مقدمات کی تحقیقات 31 دسمبر 2015 تک مکمل کریں ۔نواز شریف اور شہباز شریف کے خلاف کروڑوں روپے کرپشن کے مقدمات گزشتہ دو دہائیوں سے التواءکا شکار ہیں ۔ چیئرمین نیب نے یہ ہدایت نیب کے ڈائریکٹر جنرل کانفرنس کے دوران دی ہے اور کہا ہے کہ نیب پرانے مقدمات کو جلد نمٹانا چاہتا ہے ۔ نیب کے پاس ملک کے تمام سیاسی رہنماﺅں کے خلاف کرپشن مقدمات کی انکوائریاں التواءکا شکار چلی آ رہی ہیں ۔ چیئرمین نیب نے گزشتہ سال عہدہ سنبھالتے ہی 15 سال پرانے مقدمات کی انکوائریاں جلد نمٹانے کی ہدایت کی تھی اس حکم پر عمل کرتے ہوئے نیب کے انکوائری افسران نے 70 فیصد مقدمات کی انکوائریاں مکمل کر لی ہیں جبکہ اب چیئرمین نیب نے نواز شریف ، شہباز شریف کے علاوہ دیگر سیاسی رہنماﺅں کے خلاف کروڑوں روپے کرپشن کے مقدمات کو جلد نمٹانے کا حکم دیا ہے ۔ آن لائن کو نیب حکام نے بتایا ہے کہ انکوائری افسران نے ہائی پروفائل مقدمات کی فائلیںاوپن کر کے کام تیز کر دفیا ہے اور اس عزم کا اظہار کیا ہے کہ 31 دسمبر سے قبل ہی یہ انکوائریاں مکمل کر لی جائیں گی ۔