ننکانہ صاحب(آن لائن)مسلم لیگ (ن) اور تحریک انصاف کے کارکنوں میں خونی تصادم کے نتیجے میں 2 افراد جاں بحق اور ایک زخمی ہوگیا ،جاں بحق ہونیوالے تحریک انصاف کے کارکن ہیں ،۔میڈیا رپورٹس کے مطابق ننکانہ صاحب کے نواحی علاقے وزیرپور کی یو سی 48 میں چیئرمین کے لئے 2 کزن رانا اسرار احمد اور رانا نزیر احمد تحریک انصاف اور (ن) کی جانب سے امیدوار تھے، گزشتہ روز بھی دونوں امیدواروں کے کارکنوں میں ہاتھا پائی کے واقعات رونما ہوئے تھے لیکن نتیجہ تحریک انصاف کے حق میں آیا جس پر (ن) لیگ کے کارکنوں میں شدید غصہ پایا جاتا تھا۔ اتوار کی صبح جب تحریک انصاف کے کارکن علاقے میں پہنچے تو مسلم لیگ (ن) اور پی ٹی آئی کے کارکنوں کا آمنا سامنا ہو گیا اور پھر بات تلخ کلامی کے بعد بات فائرنگ تک جا پہنچی جس کے نتیجے میں تحریک انصاف کے 2 کارکن محمد اقبال اور محمد جمشید جاں بحق اور ایک شخص زخمی ہو گیا۔واقعہ کے بعد مقامی پولیس جائے واردات پر پہنچ گئی اور صورتحال کا جائزہ لینے کے بعد واقعہ کا مقدمہ درج کرلیا ، ابھی تک کوئی گرفتاری نہیں ہوئی۔