اسلام آباد (نیوز ڈیسک): شہر قائد میں سولر توانائی سے متعلق مصنوعات کی قیمتوں میں نمایاں کمی دیکھنے میں آئی ہے،

جس کے باعث سولر پینلز، لیتھیم بیٹریاں اور انورٹرز پہلے کے مقابلے میں زیادہ سستے ہو گئے ہیں۔مارکیٹ ذرائع کے مطابق کراچی کی الیکٹرانکس مارکیٹ میں گزشتہ چند ہفتوں کے دوران سولر سسٹمز کی قیمتوں میں واضح کمی ریکارڈ کی گئی ہے۔ خاص طور پر لیتھیم بیٹریوں کی قیمت میں تقریباً 20 ہزار روپے جبکہ مختلف انورٹرز کی قیمتوں میں 10 ہزار روپے تک کمی آئی ہے۔ اسی طرح ایک سولر پلیٹ کی قیمت بھی اوسطاً 3 ہزار روپے کم ہو گئی ہے۔تاجروں کا کہنا ہے کہ وفاقی بجٹ سے قبل سولر مصنوعات پر ممکنہ نئے ٹیکسوں کی خبروں کے باعث بعض ڈیلرز نے قیمتیں بڑھا دی تھیں، جبکہ کچھ کاروباری افراد نے زیادہ منافع کی توقع میں بڑی مقدار میں سولر سامان ذخیرہ بھی کر لیا تھا۔تاہم بجٹ میں سولر مصنوعات پر کوئی اضافی ٹیکس عائد نہ ہونے کے بعد مارکیٹ کی صورتحال تبدیل ہو گئی۔ درآمدات میں اضافے، مناسب اسٹاک کی دستیابی اور خریداری میں نسبتاً کمی کے باعث قیمتوں میں نمایاں کمی دیکھنے میں آئی ہے۔

مارکیٹ میں اس وقت 585، 645 اور 720 واٹ کے سولر پینلز تقریباً 45 روپے فی واٹ کے حساب سے فروخت ہو رہے ہیں، جبکہ چند روز پہلے یہی پینلز تقریباً 50 روپے فی واٹ میں دستیاب تھے۔اسی طرح 5 کلو واٹ صلاحیت کی لیتھیم بیٹری کی قیمت تقریباً 2 لاکھ 30 ہزار روپے ہے، جبکہ 3 سے 5 کلو واٹ کے انورٹرز مختلف برانڈز کے لحاظ سے 1 لاکھ 20 ہزار سے 3 لاکھ روپے تک فروخت کیے جا رہے ہیں۔تاجروں کے مطابق اگر آئندہ دنوں میں سپلائی کی موجودہ صورتحال برقرار رہی اور طلب میں اچانک اضافہ نہ ہوا تو سولر مصنوعات کی قیمتیں مزید مستحکم رہنے یا معمولی کمی آنے کا امکان بھی موجود ہے۔