اسلام آباد(این این آئی)پاکستان میں ویکسین کی مقامی سطح پر تیاری میں پیشرفت سامنے آئی ہے، اس سلسلے میں وفاقی وزیر صحت مصطفی کمال کی سعودی ہم منصب سے 3 ملاقاتیں ہوئیں، جن میں ویکسین کی مقامی سطح پر تیاری، سرمایہ کاری اور تکنیکی تعاون پر تبادلہ خیال کیا گیا۔وزارت صحت کے مطابق دونوں ممالک کے وزرا کے درمیان ہونے والی ملاقات میں ویکسین مینوفیکچرنگ، فارماسیوٹیکل انڈسٹری اور صنعتی اشتراک پر پیشرفت ہوئی۔

وزارت صحت کے ترجمان کے مطابق سعودی عرب کا 11 رکنی اعلیٰ سطح کا وفد آج پاکستان پہنچ رہا ہے، سعودی ہم منصب سے ملاقات میں دونوں طرف سے فوکل پرسنز مقرر ہوئے، پاکستان کی جانب سے ڈاکٹر عبید چیف ایگزیکٹو آفیسر ڈریپ فوکل پرسنز مقررہوئے جبکہ سعودی وزارت صنعت کے سینئر ایڈوائزر نزار الحریری فوکل پرسن مقرر ہوئے۔پاکستانی چیف ایگزیکٹو آفیسر کی سعودی وزارتِ صنعت کے ایڈوائزر سے 6 ملاقاتیں ہوئیں۔اس حوالے سے وفاقی وزیر صحت مصطفی کمال نے کہاکہ مقامی سطح پر ویکسین کی تیاری کیلئے پر عزم ہیں، ویکسین کی مقامی تیاری میں سعودی وفد کا دورہ فیصلہ کن قدم ثابت ہوگا، مقامی سطح پر ویکسین کی تیاری ملکی ضروریات کو پورا کرے گی، محفوظ اور معیاری ویکسین کی دستیابی یقینی بنانا حکومت کی اولین ترجیح ہے۔