اسلام آباد(نیوز ڈ یسک)پاکستان تحریک انصاف سندھ کے ایک اہم رہنما نے پارٹی چھوڑ کر پاکستان پیپلز پارٹی میں شامل ہونے کا اعلان کر دیا ہے۔ پی ٹی آئی کراچی سے تعلق رکھنے والے بلال منصور نے پیپلز پارٹی ویمن ونگ کی صدر فریال تالپور سے ملاقات کے دوران باضابطہ طور پر پیپلز پارٹی میں شمولیت اختیار کی۔اس ملاقات میں صوبائی وزیر سعید غنی، سہیل انور سیال اور ڈپٹی میئر کراچی سلمان مراد بھی شریک تھے۔
فریال تالپور نے بلال منصور کو پیپلز پارٹی میں خوش آمدید کہتے ہوئے نیک تمناؤں کا اظہار کیا۔یاد رہے کہ حالیہ عرصے میں پی ٹی آئی کو مختلف علاقوں میں سیاسی نقصان کا سامنا کرنا پڑا ہے۔ اس سے قبل ڈیڑھ ماہ پہلے مظفرآباد میں پارٹی کو اس وقت بڑا جھٹکا لگا تھا جب مرکزی رہنما اور سابق اسمبلی امیدوار سردار شاہنواز اختر نے سینکڑوں کارکنوں کے ساتھ مسلم لیگ (ن) میں شمولیت اختیار کر لی تھی۔
