ممبئی (این این آئی)بھارتی شہر ممبئی سے تعلق رکھنے والے 68 سالہ تاجر کو آن لائن ٹریڈنگ کے نام پر تقریبا 11 کروڑ روپے کا چونا لگا دیا گیا۔بھارتی میڈیا کے مطابق یہ واقعہ 29 دسمبر 2025 سے 19 جنوری 2026 کے درمیان پیش آیا، اس دوران تاجر نے مختلف بینک اکانٹس میں مجموعی طور پر 10.98 کروڑ منتقل کیے۔بھارتی میڈیا کے مطابق تاجر سرمایہ کاری کے مواقع تلاش کر رہا تھا کہ انہیں ایک آن لائن اشتہار نظر آیا۔ اس کے بعد انہوں نے اشتہار میں دیے گئے واٹس ایپ نمبر پر رابطہ کیا جہاں اِن کی بات ایک موہن شرما نامی شخص سے ہوئی جس نے اسٹاک مارکیٹ ایڈوائزر ہونے کا دعوی کیا۔تاجر کو ایک واٹس ایپ گروپ میں شامل کیا گیا جہاں روزانہ منافع کے اسکرین شاٹس شیئر کیے جاتے تھے۔
گروپ ایڈمنسٹریٹرز نے دعوی کیا کہ موہن شرما ایک بین الاقوامی کمپنی سے وابستہ ہے اور الیکس نامی شخص اس کا جنرل منیجر ہے۔بعدازاں تاجر کو پریمیم ممبر بننے کے لیے کہا گیا اور ایک لنک کے ذریعے ٹریڈنگ ایپ ڈان لوڈ کروائی گئی جہاں ان کے نام سے ایک انسٹی ٹیوشنل اکائونٹ کھولا گیا۔ تاجر جب بھی رقم منتقل کرتا اتنی ہی رقم ایپ کے والٹ میں نظر آتی جس سے ضعیف تاجر کو لگا کہ حقیقی ٹریڈنگ ہو رہی ہے۔رپورٹ کے مطابق اِنہیں مزید واٹس ایپ گروپس میں بھی شامل کیا گیا جہاں ٹریڈنگ ٹپس اور تربیت دی جاتی تھی۔
جب تاجر نے سرمایہ واپس نکالنے اور مزید سرمایہ کاری روکنے کی خواہش ظاہر کی تو تمام ملزمان نے رابطہ منقطع کر دیا، واٹس ایپ گروپس بند ہو گئے اور مزید 8 کروڑ روپے بطور جرمانہ طلب کیے گئے۔ اسی وقت تاجر کو اپنے ساتھ دھوکہ ہونے کا احساس ہوا۔بھارتی میڈیا کے مطابق متاثرہ تاجر نے نیشنل سائبر کرائم ہیلپ لائن پر شکایت درج کروائی اور بعد میں سائبر پولیس سے رجوع کیا۔ پولیس نے نامعلوم افراد کے خلاف دھوکہ دہی، مجرمانہ سازش، شناخت کی چوری اور الیکٹرانک و سوشل میڈیا کے غلط استعمال کی دفعات کے تحت ایف آئی آر درج کر لی ہے۔
