اسلام آباد (نیوز ڈ یسک)بھارتی کرکٹ کے مایہ ناز کھلاڑی ویرات کوہلی نے ملکی ون ڈے ڈومیسٹک ایونٹ وجے ہزارے ٹرافی میں شرکت سے انکار کر دیا ہے، حالانکہ بورڈ کی ہدایت تھی کہ قومی ٹیم سے فارغ وقت میں سینٹرل کنٹریکٹ یافتہ کرکٹرز کو لازمی طور پر ڈومیسٹک کرکٹ کھیلنی چاہیے۔آسٹریلیا کے خلاف بارڈر–گواسکر ٹرافی میں ناکامی کے بعد بی سی سی آئی، ہیڈ کوچ گوتم گمبھیر اور چیف سلیکٹر اجیت اگرکر نے واضح پالیسی اپنائی تھی کہ کھلاڑیوں کی فارم اور فٹنس برقرار رکھنے کے لیے مقامی سطح کے مقابلے کھیلنا ضروری ہے۔ بورڈ نے حال ہی میں ویرات کوہلی اور روہت شرما دونوں کو خصوصی طور پر یہ پیغام بھی دیا تھا کہ قومی ٹیم کا حصہ رہنے کے لیے ڈومیسٹک ٹورنامنٹس میں شرکت لازمی ہوگی۔

تاہم بھارتی میڈیا کے مطابق ویرات کوہلی نے اس فیصلہ پر رضامندی ظاہر نہیں کی اور انہوں نے رواں ماہ کے اختتام پر شروع ہونے والی وجے ہزارے ٹرافی میں کھیلنے سے صاف انکار کر دیا ہے۔ اگرچہ انہوں نے اتوار کو جنوبی افریقہ کے خلاف اپنی 52ویں ون ڈے سنچری بھی اسکور کی، لیکن اس کے باوجود وہ مقامی کرکٹ میں حصہ لینے پر آمادہ نہیں ہوئے، جس سے بورڈ میں نئی بحث چھڑ گئی ہے۔رپورٹس کے مطابق روہت شرما وجے ہزارے ٹرافی میں ممبئی کی نمائندگی کرنے کے لیے تیار ہیں، مگر کوہلی کے انکار نے بی سی سی آئی اور ٹیم مینجمنٹ کے ساتھ ان کے ممکنہ اختلافات کو مزید نمایاں کر دیا ہے۔بھارتی میڈیا نے یہ دعویٰ بھی کیا ہے کہ ہیڈ کوچ گوتم گمبھیر اور سینئر کھلاڑیوں—ویرات کوہلی اور روہت شرما—کے درمیان تعلقات میں تناؤ پیدا ہوگیا ہے۔ ون ڈے ٹیم کے ڈریسنگ روم کا ماحول اس وقت شدید دباؤ میں بتایا جا رہا ہے۔

ایک اور رپورٹ میں کہا گیا ہے کہ آسٹریلیا کے خلاف ون ڈے سیریز میں دونوں سینئرز کی واپسی کے باوجود ٹیم کا ماحول وہ ہم آہنگی دوبارہ حاصل نہیں کر سکا جو ٹیسٹ سیریز کے دوران موجود تھی۔ گمبھیر اور دونوں تجربہ کار بیٹرز کے درمیان اعتماد اور رابطے کی کمی کھل کر سامنے آ رہی ہے، خصوصاً اس وقت سے جب کوہلی اور روہت نے اچانک ٹیسٹ کرکٹ سے ریٹائرمنٹ کا اعلان کیا۔