اسلام آباد (نیوز ڈیسک)مسلم لیگ (ن) نے آزاد کشمیر کی حکومت سے علیحدگی اختیار کرنے کا باضابطہ اعلان کر دیا ہے۔صدر مسلم لیگ (ن) آزاد کشمیر شاہ غلام قادر نے میڈیا سے گفتگو میں کہا کہ ان کی جماعت کسی غیر فطری یا عارضی حکومت سازی کا حصہ نہیں بنے گی اور اب اپوزیشن میں بیٹھنے کا فیصلہ کیا گیا ہے۔شاہ غلام قادر کا کہنا تھا کہ اگر پیپلز پارٹی تحریکِ عدم اعتماد لاتی ہے تو یہ اس کا جمہوری حق ہے، تاہم مسلم لیگ (ن) کسی بھی نئی حکومت میں شامل نہیں ہوگی۔
انہوں نے واضح کیا کہ جو ارکان پارٹی پالیسی سے ہٹ کر فیصلے کریں گے، ان کے خلاف تنظیمی کارروائی عمل میں لائی جائے گی۔ ان کے مطابق آزاد کشمیر میں نئی حکومت صرف شفاف عام انتخابات کے ذریعے ہی وجود میں آنی چاہیے۔صدر مسلم لیگ (ن) آزاد کشمیر نے مزید کہا کہ جماعت ہمیشہ مہاجرینِ کشمیر اور بیرونِ ملک کشمیریوں کی فلاح کے لیے سرگرم رہی ہے اور آئینی و سیاسی بحران کے حل میں مثبت کردار ادا کرتی رہے گی۔انہوں نے کہا کہ نواز شریف اور شہباز شریف کی قیادت میں آئندہ عام انتخابات کے لیے بھرپور مہم چلائی جائے گی تاکہ عوامی حمایت حاصل کی جا سکے۔
