پشاور: خیبر پختونخوا پولیس نے اینڈروئڈ (Android) پر مبنی ون کلک ایس او ایس سروس شروع کرنے کا اعلان کیا ہے، جس کے تحت موبائل فون کے ذریعے صرف ایک کلک کرکے پولیس کو کسی بھی ایمرجنسی کے بارے میں آگاہ کیا جا سکے گا۔

پولیس ترجمان کے مطابق سروس کے تحت حملے کی زد میں آنے والا کوئی بھی شخص، یا ادارے کی انتظامیہ اپنے موبائل سیٹ پر صرف ایک کلک کر کے مقامی پولیس کو الرٹ کر سکے گی۔

الرٹ بٹن پر ایک کلک سے خود بخود تقریباً دس مختلف اسٹیشنوں بشمول متعلقہ ضلعی پولیس کنٹرول، متعلقہ فیلڈ آفسروں اور سینٹرل پولیس آفس کو الرٹ بھیجا جا سکے گا۔

الرٹ ایس ایم ایس اور ٹیلی فون کال کی شکل میں پہنچے گا، اور حملے کی جگہ کی صحیح پوزیشن اور پتے کے بارے میں تفصیلات فراہم کرے گا۔

ترجمان کے مطابق ابتدائی طور پر اس سروس کو پشاور کے تمام سکولوں اور تعلیمی اداروں کے لیے شروع کیا جارہا ہے، اور بہت جلد اس کا دائرہ صوبے کے تمام تعلیمی اداروں اور دوسری غیر محفوظ جگہوں تک بڑھایا جائے گا۔