اسلام آباد (نیوز ڈیسک) وفاقی دارالحکومت اسلام آباد، پشاور اور ملک کے متعدد شہروں میں زلزلے کے جھٹکے محسوس کیے گئے، جس کے باعث شہریوں میں خوف و ہراس پھیل گیا۔اسلام آباد اور راولپنڈی کے علاوہ قریبی علاقوں میں بھی زمین ہلنے کے اثرات محسوس ہوئے۔ خیبر پختونخوا کے شہروں پشاور، اپر دیر، لوئر دیر، مالاکنڈ، باجوڑ، نوشہرہ، ہنگو اور کوہاٹ سمیت مانسہرہ، ایبٹ آباد، سوات، مہمند، شبقدر، چارسدہ اور پاراچنار میں بھی جھٹکے ریکارڈ کیے گئے۔

پنجاب کے اضلاع ملتان، اٹک، راولپنڈی، میانوالی، چکوال، تلہ گنگ اور کلرکہار سمیت گردونواح کے علاقوں میں بھی زمین لرز اٹھی۔ آزاد کشمیر کے دھیرکوٹ اور وادی نیلم میں بھی جھٹکوں کی اطلاع ملی۔زلزلہ پیما مرکز کے مطابق زلزلے کی شدت 5.9 ریکارڈ کی گئی جبکہ اس کی گہرائی 111 کلومیٹر اور مرکز ہندوکش ریجن افغانستان تھا۔زلزلے کے دوران شہری کلمہ طیبہ کا ورد کرتے ہوئے گھروں اور دکانوں سے باہر نکل آئے، تاہم کسی جانی یا مالی نقصان کی اطلاع نہیں ملی۔