اسلام آباد(نیوز ڈیسک)بھارت کے خلاف حالیہ کامیابی کے بعد پاکستان نے اپنے دفاعی نظام کو مزید مضبوط بنانے کے لیے ایک اہم پیشرفت کی ہے۔ وفاقی حکومت نے فیصلہ کیا ہے کہ مخصوص دفاعی مقاصد کے لیے استعمال شدہ گاڑیوں کی عارضی درآمد کی اجازت دی جائے گی۔ذرائع کے مطابق، وفاقی کابینہ نے اس اقدام کی منظوری دے دی ہے اور اس کے تحت امپورٹ پالیسی آرڈر 2022 میں ترمیم کر دی گئی ہے۔ ترمیم کے مطابق یہ اجازت صرف منتخب اداروں کو دی جائے گی اور وہ بھی صرف ری-ایکسپورٹ (دوبارہ برآمد) کے مقصد سے۔

یہ سہولت ان اداروں کے لیے مخصوص ہوگی جو دفاعی پیداوار سے وابستہ ہیں اور حکومت کی ملکیت میں کام کر رہے ہیں، بشمول ان کے تجارتی ذیلی ادارے۔ اسی طرح، فیڈرل بورڈ آف ریونیو (ایف بی آر) کے ایکسپورٹ فیسلیٹیشن سپورٹ اسکیم میں رجسٹرڈ ادارے بھی اس سہولت سے مستفید ہو سکیں گے۔ذرائع نے یہ بھی واضح کیا کہ ان گاڑیوں کی درآمد کے لیے وزارتِ دفاعی پیداوار اور وزارتِ داخلہ سے این او سی (NOC) حاصل کرنا لازم ہوگا۔ اجازت صرف گاڑیوں یا ان کے چیسس کی درآمد تک محدود رکھی گئی ہے۔یہ فیصلہ پاکستان کی دفاعی تیاری کو جدید خطوط پر استوار کرنے کی کوششوں کا حصہ ہے، تاکہ خطے میں سکیورٹی کے تقاضوں کو بہتر طور پر پورا کیا جا سکے۔