اسلام آباد (این این آئی)ڈیٹا والٹ پاکستان نے کراچی میں ملک کے پہلے مصنوعی ذہانت پر مبنی ڈیٹا سینٹر کا باضابطہ طور پر افتتاح کر دیا جو ایک انقلابی اقدام ہے اور ملک میں اے آئی کی ترقی، نفاذ اور توسیع کے طریقے کو بدل کر رکھ دے گا۔یہ جدید ترین سہولت پاکستان کے اے آئی ایکو سسٹم کے وژن کو حقیقت میں بدلنے کے لیے تیار کی گئی ہے، جو اسٹارٹ اپس، محققین، کاروباری اداروں اور سرکاری اداروں کے لیے شاندار انفرااسٹرکچر فراہم کرتی ہے۔
ہائی پرفارمنس GPU کمپیوٹنگ سے لے کر محفوظ کلاڈ ماحول تک، ڈیٹا والٹ اب ملک میں ہی جدید AI جدت کی راہ ہموار کر رہا ہے وہ بھی صاف توانائی سے چلنے والے نظام اور خود مختار انفرااسٹرکچر کے ساتھ۔ڈیٹا والٹ پاکستان کی بانی اور سی ای او مہوش سلمان علی نے کہاہے کہ ہم نے صرف ایک ڈیٹا سینٹر نہیں بنایا، ہم نے پاکستان کے اے آئی مستقبل کیلئے ایک لانچ پیڈ تیار کیا ہے۔ ہمارا مقصد یہ ہے کہ مقامی جدت پسندوں کو وہ وسائل اور اعتماد دیا جائے جس کی بنیاد پر وہ عالمی معیار کی ٹیکنالوجی تیار کر سکیں بغیر کسی غیر ملکی پلیٹ فارم پر انحصار کیے۔ یہ خود انحصاری، خودمختاری، اور پاکستان کی ڈیجیٹل صلاحیتوں کو اجاگر کرنے کی بات ہے۔
