اسلام آباد (نیوز ڈیسک) ترک فضائیہ نے ایران کی طرف جانے والے اسرائیلی جنگی طیاروں کی ترک فضائی حدود میں موجودگی پر فوری ردِعمل دیا۔

جیو نیوز کی رپورٹ کے مطابق ترکی کے ایک مؤقر اخبار نے دعویٰ کیا ہے کہ ایران پر ابتدائی حملے کے دوران اسرائیلی طیارے مختصر وقت کے لیے ترکی کی فضائی حدود میں داخل ہوئے تھے۔ جیسے ہی ترک ریڈار سسٹمز نے ان طیاروں کو شناخت کیا، ترک فضائیہ کے F-16 طیارے فوری طور پر فضا میں بلند ہوئے۔

ذرائع کے مطابق ترک لڑاکا طیاروں نے اسرائیلی جہازوں کو وارننگ دی اور فوری طور پر حدود سے نکلنے کی ہدایت کی، جس پر اسرائیلی طیارے بغیر کسی مزاحمت کے ترک فضائی حدود سے نکل گئے۔

ترک اخبار کا یہ بھی کہنا ہے کہ ترکی، جو نیٹو کا رکن ملک ہے، کو اپنے انٹیلیجنس نیٹ ورک کے ذریعے ممکنہ اسرائیلی حملے سے قبل ہی آگاہی حاصل ہو چکی تھی۔ اسی بنا پر ترکی کی فضائی نگرانی کے نظام کو مشرقی سرحد پر پوری طرح متحرک کر دیا گیا تھا، جہاں 24 گھنٹے فضائی حدود کی کڑی نگرانی جاری ہے۔