تہران (نمائندہ خصوصی) ایران نے عالمی برادری کو خبردار کر دیا ہے کہ وہ اسرائیل کے خلاف ایک بڑی عسکری کارروائی کی تیاری کر رہا ہے۔ ایرانی ذرائع ابلاغ کے مطابق، تہران نے امریکا، برطانیہ اور فرانس کو باضابطہ طور پر آگاہ کر دیا ہے کہ اسرائیلی اقدامات کا ردعمل شدید اور وسیع پیمانے پر ہو گا۔
رپورٹس کے مطابق، ایرانی صدر نے اسرائیل کی جانب سے حالیہ حملے کے بعد اپنی کابینہ کا ایک ہنگامی اجلاس بلایا، جس کی صدارت انہوں نے خود کی۔ اس اجلاس میں اسرائیلی جارحیت کے ممکنہ جواب پر غور کیا گیا اور مختلف آپشنز پر تفصیلی مشاورت ہوئی۔
ایرانی حکام کا کہنا ہے کہ یہ حملہ محدود نوعیت کا نہیں ہو گا، بلکہ بھرپور اور واضح پیغام دینے کے لیے انجام دیا جائے گا۔ اس پیش رفت نے خطے میں کشیدگی مزید بڑھا دی ہے، اور مغربی ممالک کی تشویش میں بھی اضافہ ہوا ہے۔
ذرائع کا کہنا ہے کہ ایران نے مغربی طاقتوں کو پیشگی اطلاع دے کر سفارتی سطح پر واضح کر دیا ہے کہ اسرائیل کی جارحانہ پالیسیوں کا خمیازہ اب اسے بھگتنا ہوگا۔
