اسلام آباد(نیوز ڈیسک )امریکی صدر نے بھارت میں ٹیسلا کا مینوفیکچرنگ پلانٹ لگنے سے رکوا دیا، ایلون مسک کی کمپنی ٹیسلا نے اب بھارت میں صرف شو رومز کھولنے میں دلچسپی ظاہر کر دی۔ تفصیلات کے مطابق بھارت کو معاشی و تجارتی میدان میں ایک اور بڑا دھچکا پہنچا ہے۔ معروف امریکی کمپنی ٹیسلا کے بھارت میں پیداواری پلانٹس لگانے کا معاملہ بھی کھٹائی میں پڑ گیا۔
جیو نیوز کے مطابق امریکی صدر ڈونلڈ ٹرمپ نے بھارت میں ٹیسلا کا پیداواری پلانٹ لگنے سے رکوا دیا ہے۔ بھارتی وزیر کی جانب سے اس حوالے سے تصدیق کرتے ہوئے بتایا گیا ہے کہ ٹیسلا نے صرف بھارت میں صرف شورومز کھولنے میں دلچسپی ظاہر کی ہے۔ اس حوالے سے حال ہی میں امریکی صدر ڈونلڈ ٹرمپ نے اپنے ایک بیان میں کہا تھا کہ ایلون مسک نے بھارت میں ٹیسلا کی فیکٹری لگائی تویہ امریکا کےساتھ ناانصافی ہوگی، ٹیسلا سمیت دیگر کمپنیوں کو کاریں، پرزے امریکا میں بنانے چاہئیں۔
جبکہ ڈونلڈ ٹرمپ بھارت میں ایپل کمپنی کے پیدواری پلانٹس لگانے کی بھی مخالفت کر چکے۔ “ایپل” کمپنی کی مصنوعات اپنے ملک میں تیار کرنے کا خواب دیکھنے والے بھارت کو اس وقت بڑا دھچکا پہنچا جب امریکی صدر ڈونلڈ ٹرمپ نے دو ٹوک الفاظ میں ایپل کمپنی کی مصنوعات کی تیاری کی صنعت بھارت منتقل کرنے کی کھل کر مخالفت کر دی۔ گزشتہ ماہ دورہ قطر کے دوران میڈیا سے گفتگو کرتے ہوئے امریکی صدر نے کہا کہ ایپل کمپنی کے مالک ٹم کک میرے دوست ہیں، یہ اچھا کاروبار کرتے ہیں، تاہم میں نہیں چاہتا کہ ایپل بھارت میں اپنی مصنوعات بنائے۔
بھارت میں کاروبارمشکل ہے، وہاں ٹیرف کی شرح بہت زیادہ ہے، ایپل کمپنی بھارت میں پلانٹ نہ لگائے۔ ایپل کے سربراہ کو کہا ہے کہ بھارت میں سرمایہ کاری کیوں کر رہے ہیں؟ بھارت کے بجائے امریکا میں پیداوار بڑھانے پر زور دیں۔
