ڈھاکہ/نئی دہلی(این این آئی)بنگلہ دیش نے بھارت کے ساتھ 2 کروڑ 10 لاکھ ڈالر (تقریباً 21 ملین ڈالر) کا ایک اہم دفاعی معاہدہ منسوخ کر دیا ،یہ معاہدہ بھارتی سرکاری دفاعی کمپنی ”گارڈن ریچ شپ بلڈرز اینڈ انجینئرز لمیٹڈ” کو ایک جدید سمندری ٹگ بوٹ بنانے کیلئے جولائی 2024 میں دیا گیا تھا۔بھارتی اخبار دی ہندو کے مطابق، بنگلہ دیش کا یہ فیصلہ ایسے وقت میں سامنے آیا ہے جب بھارت نے حال ہی میں بنگلہ دیش کو ٹریڈ ٹرانس شپمنٹ کی سہولت واپس لے لی ہے، جس کے تحت بنگلہ دیش اپنے سامان کو تیسرے ممالک بھیج سکتا تھا۔
ماہرین کے مطابق یہ اقدام دونوں ممالک کے درمیان بڑھتے ہوئے سفارتی تناؤ کی علامت ہے، جو وزیر اعظم شیخ حسینہ کی حکومت کے اگست 2024 میں ختم ہونے کے بعد مزید نمایاں ہو گیا ہے۔گارڈن ریچ شپ بلڈرز اینڈ انجینئرز لمیٹڈ نے انڈین اسٹاک ایکسچینج کو جمع کرائی گئی رپورٹ میں اس معاہدے کی منسوخی کی تصدیق کی ہے۔ تاہم،گارڈن ریچ شپ بلڈرز اینڈ انجینئرز لمیٹڈ نے اعلان کیا کہ وہ انڈین نیوی کیلئے اگلی نسل کے جنگی جہازوں (Next Generation Corvettes) کے ٹینڈر میں سب سے کم بولی دینے والا ادارہ بن چکا ہے۔
