اسلام آباد (رپورٹ) وفاقی وزیر داخلہ محسن نقوی نے ہدایت کی ہے کہ پاسپورٹ کے اجرا کے لیے مجوزہ نئی شرائط کے قانونی پہلو مکمل کیے جائیں تاکہ گداگری اور غیرقانونی ہجرت جیسے مسائل کی مؤثر طور پر روک تھام کی جا سکے۔
یہ ہدایات انہوں نے ڈائریکٹوریٹ آف امیگریشن میں ایک اہم اجلاس کے دوران دیں، جس میں وزیر مملکت برائے داخلہ طلال چوہدری، سیکریٹری داخلہ، ڈی جی ایف آئی اے اور ڈی جی پاسپورٹ بھی شریک تھے۔
اجلاس سے خطاب کرتے ہوئے محسن نقوی نے کہا کہ پاسپورٹ کے لیے نئی شرائط نہ صرف غیر قانونی سرگرمیوں کو کنٹرول کرنے میں مدد دیں گی بلکہ بین الاقوامی سطح پر پاکستان کا مثبت تاثر بھی اجاگر ہوگا۔
وزیر مملکت طلال چوہدری نے کہا کہ یہ فیصلہ بیرونی دنیا کو پاکستان کی سنجیدہ کاوشوں کا پیغام دے گا، جبکہ وزیر داخلہ نے یہ بھی ہدایت کی کہ جن افراد کو بیرون ملک سے ڈی پورٹ کیا گیا ہے، ان کے پاسپورٹ بلاک کرنے کے عمل کو 100 فیصد یقینی بنایا جائے۔
محسن نقوی نے پاسپورٹ آفس میں حال ہی میں نصب کی گئی چھ نئی ایم آر پی اور دو ای-پاسپورٹ مشینوں کا بھی معائنہ کیا اور ان کی تنصیب پر اطمینان کا اظہار کیا۔ اس موقع پر انہوں نے جرمن ٹیم سے بھی ملاقات کی، جو ان مشینوں کی تنصیب میں معاونت کر رہی ہے۔
وزیر داخلہ نے کہا کہ جدید مشینوں سے پاسپورٹ کے اجرا کا عمل مزید تیز ہوگا اور دفتر کی مجموعی کارکردگی میں بہتری آئے گی۔ اس موقع پر ڈی جی پاسپورٹ نے بریفنگ دیتے ہوئے بتایا کہ شہریوں کی سہولت کے لیے جلد ایک موبائل ایپ بھی متعارف کرائی جائے گی، جس سے درخواست کا عمل آسان ہو جائے گا۔
