اسلام آباد (نیوز ڈیسک)بھارت میں ایک نوجوان طالبہ دورانِ تقریر دل کا دورہ پڑنے سے جاں بحق ہو گئی، افسوسناک واقعہ ریاست مہاراشٹرا کے شہر دھاراشیو میں پیش آیا۔
بھارتی میڈیا رپورٹس کے مطابق 20 سالہ ورشا نامی طالبہ ایک کالج تقریب کے دوران اسٹیج پر مراٹھی زبان میں تقریر کر رہی تھی۔ ویڈیو میں دیکھا گیا کہ تقریر کے دوران حاضرین اور خود طالبہ بھی مسکرا رہی تھی، مگر چند لمحوں بعد اس کی آواز دھیمی پڑنے لگی اور وہ اچانک اسٹیج پر گر گئی۔
اس واقعے پر اسٹیج کے قریب موجود افراد فوراً اس کی مدد کو دوڑے اور ورشا کو فوری طور پر قریبی اسپتال منتقل کیا گیا، تاہم ڈاکٹروں نے تصدیق کی کہ وہ پہلے ہی دم توڑ چکی تھی۔
اس واقعے نے سوشل میڈیا پر گہری تشویش اور افسوس کی لہر دوڑا دی ہے۔ یہ پہلا موقع نہیں کہ بھارت میں ایسی کوئی سانحہ رونما ہوا ہو، اس سے قبل بریلی میں 50 سالہ تاجر وسیم بھی اپنی شادی کی سلور جوبلی کے موقع پر دل کا دورہ پڑنے سے انتقال کر چکے ہیں۔
رپورٹس کے مطابق وسیم اپنی اہلیہ فرح کے ساتھ خوشی خوشی رقص کر رہے تھے کہ وہ اچانک زمین پر گر پڑے۔ انہیں بھی فوری طور پر اسپتال لے جایا گیا، مگر ڈاکٹرز نے ان کی زندگی بچانے میں ناکامی ظاہر کی۔
دونوں واقعات نے یہ ظاہر کیا ہے کہ اچانک دل کے دورے جیسے واقعات کسی بھی لمحے زندگی کا رخ بدل سکتے ہیں، خواہ انسان خوشی کے لمحات میں ہی کیوں نہ ہو۔
