پشاور(این این آئی)صوابی کے علاقے گائوں احد خان کلے شیخ جانہ میں فائرنگ سے سابق سینیٹر مشتاق احمد خان کا بھائی گھر کے سامنے قتل، شکیل احمد کی نماز جنازہ سہ پہر 3 بجے گائوں کالو خان میں ادا کی گئی۔جماعت اسلامی خیبرپختونخواکیسابق امیر و سینیٹر مشتاق احمد خان کے بڑے بھائی کو صوابی میں ان کے گھر کے سامنے گولیاں مار کر قتل کردیا گیا،پولیس کے مطابق شکیل احمد خان کو گھر کے سامنے گولیاں مارکر قتل کیا گیا، واقعہ صوابی کے گاؤں احد خان کلے شیخ جانہ میں پیش آیا۔

ڈی پی او صوابی محمد اظہر نے کہاے کہ شکیل احمد خان اپنے ہمسائے کی فائرنگ سے جاں بحق ہوئے، ملزم نے پہلے والدکا قتل کیا، مقتول شکیل خان بیچ بچاؤ کے لئے گئے تھے،ڈی پی او صوابی کے مطابق بیچ بچاؤ کے دوران شکیل خان فائرنگ کا نشانہ بنے۔ڈی پی او صوابی نے کہا کہ مبینہ طور پر ملزم نشے کا عادی ہے، دماغی توازن بھی مکمل درست نہیں ۔سوشل میڈیا پر جاری بیان میں سابق سینیٹر مشتاق احمد خان نے گہرے رنج و غم کا اظہار کرتے ہوئے کہا کہ بڑے بھائی شکیل احمد خان کو گاؤں میں گھر کے سامنے شہید کیا گیا۔مشتاق احمد خان نے کہا کہ بڑے بھائی مجھے بہت عزیز تھے، یہ میرے دست وبازو تھے، یہ بدترین درندگی ہے۔