لاہور( نیوزڈیسک)پاکستان تحریک انصاف کے چیئرمین عمران خان کی زیر صدارت اجلاس میں این اے 122کے ضمنی انتخاب میں رہنماﺅں کی کارکردگی ،ووٹر لسٹوں میں ہیر پھیر سمیت مجموعی صورتحال پر تبادلہ خیال کیا گیا ۔ پی ٹی آئی کے سربراہ عمران خان اسلام آباد سے لاہور پہنچنے کے بعد چیئرمین سیکرٹریٹ پہنچے جہاں منعقد ہ اجلاس میں جہانگیر خان ترین ،چوہدری محمد سرور ، عبد العلیم خان ، شعیب صدیقی سمیت دیگر رہنماﺅں نے شرکت کی ۔ اجلاس میں این اے 122کے ضمنی انتخاب کے روز خصوصا ً رہنماﺅںکی کارکردگی اور سامنے آنے والی خامیوں پر تبادلہ خیال کے علاوہ عمران خان کو ووٹر لسٹوں میں ہیر پھیر اوراس کی تحقیقات کے لئے بنائے گئے سیل کے حوالے سے بریفنگ دی گئی ۔ ذرائع کے مطابق اجلاس میں فیصلہ کیا گیاہے کہ تحقیقات کے بعد اگر ٹھوس ثبوت سامنے آتے ہیں تو نہ صرف الیکشن کمیشن سے رجوع کیا جائے گا بلکہ آئندہ کی حکمت عملی کا بھی اعلان کیا جائے گا۔ ذرائع کے مطابق عمران خان نے واضح کہا کہ وہ ہر کسی کی کارکردگی سے بخوبی آگاہ ہیں ۔ اجلاس میں اوکاڑہ میں ہونے والے ضمنی انتخاب میں پارٹی کی کارکردگی کے علاوہ چوہدری محمد سرور نے آزاد حیثیت میں جیتنے والے امیدوار چوہدری ریاض الحق جج سے رابطے کے بارے میں بھی آگاہ کیا ۔