اسلام آباد (نیوز ڈیسک)ایک پاکستانی نوجوان کی محبت میں گرفتار ہو کر کراچی آنے والی امریکی خاتون اونیجا اینڈریو رابنسن کو دبئی میں حکام نے اپنی تحویل میں لے لیا، جبکہ انہیں واپس امریکا بھیجنا ایک پیچیدہ مسئلہ بن چکا ہے۔

تفصیلات کے مطابق، اونیجا رابنسن 7 فروری کو کراچی سے ایمریٹس کی پرواز ای کے 603 کے ذریعے دبئی پہنچیں، جہاں سے انہیں نیویارک کے لیے روانہ ہونا تھا۔ تاہم، انہوں نے اپنی فلائٹ چھوڑ دی اور دبئی میں ہی رکنے کا فیصلہ کیا۔ نیویارک میں ان کے اہلِ خانہ ان کا انتظار کرتے رہے، لیکن جب وہ وہاں نہ پہنچیں تو امریکی حکام نے ان کی تلاش شروع کر دی۔بعد ازاں، جب دبئی کی سڑکوں پر ان کی ویڈیوز سوشل میڈیا پر وائرل ہوئیں تو اماراتی حکام نے انہیں تحویل میں لے لیا۔

تاہم، قانونی طور پر انہوں نے کوئی جرم نہیں کیا کیونکہ وہ وزٹ ویزا پر دبئی میں مقیم ہیں، اسی لیے انہیں زبردستی امریکا ڈی پورٹ نہیں کیا جا سکتا۔دوسری جانب، کسی بھی ایئرلائن یا پائلٹ نے انہیں سیکیورٹی خدشات کے باعث 15 گھنٹے کی طویل پرواز میں لے جانے سے انکار کر دیا ہے۔ اب یہ کوشش کی جا رہی ہے کہ انہیں رضامند کر کے امریکا واپسی کے لیے آمادہ کیا جائے، تاہم یہ معاملہ کب اور کیسے حل ہوگا، اس حوالے سے ابھی کچھ کہنا قبل از وقت ہوگا۔