لاہور ( این این آئی) پنجاب میں گھروں میں گاڑی دھونے پر پابندی عائد کردی گئی ،گھر میں گاڑی دھونے پر 10ہزار روپے جرمانہ ہوگا ۔لاہور ہائی کورٹ کے حکم پر محکمہ ماحولیات نے احکامات جاری کر دیئے ۔ سینئر وزیر پنجاب مریم اورنگزیب، سیکریٹری ماحولیات راجہ جہانگیر، ڈی جی ماحولیات عمران حامد نے لاہور ہائیکورٹ کے حکم پر کمیٹی تشکیل دی۔ترجمان کے مطابق تمام غیرقانونی سروس اسٹیشن فوری بند کروانے کا حکم بھی جاری کیا گیا ہے ۔

پانی ری سائیکل کرنے کے سسٹم کے بغیر سروس اسٹیشن پر ایک لاکھ جرمانہ عائد ہوگا، 28فروری تک پنجاب بھر کے سروس اسٹیشنز کو پانی ری سائیکلنگ سسٹم لگانے کا حکم دیا گیا ہے۔ جبکہ کسی بھی قسم کے تیل سے گاڑی دھلوانے پر بھی پابندی عائد کی گئی ہے ۔ ڈی جی ماحولیات پنجاب عمران حامد شیخ نے کہا کہ گھروں میں گاڑی دھونے، پائپ کے استعمال پر 10ہزار جرمانہ ہوگا، تعمیراتی مقام پر بھی زمینی پانی کے استعمال پر پابندی عائد ہو گی ۔ پنجاب انوائرمنٹل ایکٹ کے تحت تمام پابندیوں کا اطلاق فوری نافذ ہوگا۔جس کا باقاعدہ طور پر نوٹیفکیشن بھی جاری کر دیا گیا ہے ۔محکمہ ماحولیات کے مطابق پنجاب میں گزشتہ پانچ کے دوران 42فیصد کم بارشیں ہوئیں۔