اوٹاوا(این این آئی)کینیڈین فوٹوگرافر نے ہائیڈرو اٹلانٹک جہاز کے ملبے کے پاس 50 میٹر گہرے پانی کے اندر فوٹو شوٹ کا نیا ورلڈ ریکارڈ قائم کر دیا۔سمند کے گہرے پانی کے اندر ماڈل کے ساتھ فوٹو شوٹ کرتے ہوئے کینیڈا کے فوٹوگرافر اسٹیون ہیننگ نے نیا گنیز ورلڈ ریکارڈ قائم کر کے شاندار کارنامہ انجام دیا۔ یہ فوٹوشوٹ امریکی ریاست فلوریڈا کے بوکا رتن میں ہائیڈرو اٹلانٹک جہاز کے ملبے کے عرش پر کی گئی۔

جس جگہ فوٹ شوٹ کا عمل انجام دیا گیا وہ زیرسمند زمین سے تقریبا 50 میٹر یعنی 163.38 فٹ کی گہرائی میں واقع ہے۔ہائیڈرو اٹلانٹک سائٹ کو ایک حکمت عملی کے تحت منتخب کیا گیا تھا کیونکہ یہ ڈیکمپریشن زون سے کافی دور ہے، اور اس کے لیے فوٹوگرافر کی ٹیم کو منفرد چیلنجز کا بھی سامنا کرنا پڑا۔فوٹوگرافر اسٹیون ہیننگ، جو اس سے قبل یہ ریکارڈ دو بار توڑ چکے ہیں، انھوں نے جرات مندانہ کوشش کے ساتھ اپنے ریکارڈ کو دوبارہ حاصل کیا۔ہیننگ نے جون 2021 اور ستمبر 2023 میں بالترتیب 21 فٹ اور 30 میٹر کی گہرائی میں شوٹنگ کرتے ہوئے ریکارڈ قائم کیا تھا۔تاہم ان کا یہ ریکارڈ دسمبر 2023 میں ساتھی کینیڈین فوٹوگرافر کم برونا اور پیا اویارزون نے توڑ دیا تھا، جنھوں نے بہاماس میں 131 فٹ کی گہرائی میں فوٹو شوٹ کیا تھا۔