بیروت(نیوز ڈیسک) شام میں داعش نے روسی بمباری کا نشانہ بننے والے شمال مغربی علاقے میں اہم کامیابیاں حاصل کرتے ہوئے الپو کے قریب چھ دیہات پر قبضہ کرلیا ہے اور ترک سرحد کی جانب جانے والے اہم شمالی راستے کو بند کرنے کی بھی دھمکی دی ہے۔ امریکی اخبار نیویارک ٹائمز کے مطابق کریملن کا کہنا ہے داعش کا مقابلہ کرنے کے لئے اس کی فوج شام میں داخل ہوچکی ہے مگر یہ فورسز زیادہ تر ان جنگجو?ں کو نشانہ بنا رہی ہیں جو صدر بشارالاسد کے خلاف برسرپیکار ہیں اور دوسری جانب داعش نے روسی فضائی حملوں اور فری سیریا آرمی کے زیرعتاب آنے کا فائدہ اٹھاتے ہوئے الپو کے نواح میں پیش قدمی کی ہے۔ داعش کی پیش قدمی سے الپو کے شمال میں اہم تزویراتی علاقے کو خطرات لاحق ہوگئے ہیں جبکہ جمعرات کو الپو میں داعش کے ساتھ لڑائی میں ایرانی جنرل حسین ہمدانی بھی مارا گیا تھا۔ جنرل ہمدانی نے ایران عراق جنگ میں نمایاں کردار ادا کیا تھا اور وہ 2009 کے ایرانی انتخابات کے بعد پھوٹنے والے ہنگاموں کے خلاف کریک ڈاون کے بھی کمانڈر تھے۔ ایرانی فوجی شام میں حکومتی فورسز کو تربیت دینے میں مصروف ہیں