واشنگٹن(این این آئی)سابق امریکی صدر ڈونلڈ ٹرمپ نے فیس بک کے بانی مارک زوکربرگ کو دھمکی دی ہے کہ اگر انہوں نے دھوکہ دیا تو وہ انہیں زندگی بھر جیل میں ڈال دیں گے۔غیرملکی میڈیاکے مطابق ڈونلڈ ٹرمپ نے اپنی نئی کتاب سیوامریکا جو 3ستمبر کو شائع ہو گئی کے اقتباسات میں لکھا ہے کہ ہم ان کی کڑی نگرانی کر رہے ہیں اگر انہوں نے اس بار کوئی غیر قانونی کام کیا تو وہ اپنی باقی زندگی جیل میں گزاریں گے، جیسا کہ انتخابات میں دھوکہ دہی کرنے والے دوسروں کا انجام ہوگا۔

میڈیارپورٹ کے مطابق ڈونلڈ ٹرمپ نے فیس بک کے مالک پر گزشتہ صدارتی انتخابات کے دوران ان کے خلاف سازش کرنے کا الزام لگایا، جس کی وجہ سے 2020میں جو بائیڈن کی فتح ہوئی۔کتاب میں شامل وائٹ ہائوس میں ڈونلڈ ٹرمپ کی مارک زوکربرگ کے ساتھ ملاقات کی ایک نامعلوم تصویر دکھائی گئی ہے۔ریپبلکن امیدوار نے لکھاکہ وہ اوول آفس میں ان سے ملنے آتے اور اپنی اہلیہ (پرسکیلا)کو ڈنر پر لے جاتے، اور وہ بہت اچھے تھے لیکن پردے کے پیچھے وہ ہمیشہ صدر کے خلاف سازشیں کرتے رہے۔

انہوں نے کہاکہ انہوں نے انہیں بتایا کہ فیس بک پر ڈونلڈ ٹرمپ جیسا کوئی نہیں ہے لیکن ساتھ ہی انہوں نے اپنا پلیٹ فارم ان کے خلاف استعمال کیا۔یہ انتباہ ڈونلڈ ٹرمپ کے مارک زوکربرگ پر تازہ حملے کی نمائندگی کرتا ہے، جن پر وہ بارہا صدارتی انتخابات میں مداخلت کا الزام لگا چکے ہیں۔فیس بک کی مالک کمپنی میٹا نے قدامت پسندوں کو یقین دلانے کے لیے اقدامات کیے کہ اس سے رواں سال کی انتخابی مہم متاثر نہیں ہوگی۔