اسلام آباد (این این آئی)رہنماء پی ٹی آئی شیر افضل مروت نے کہا ہے کہ مجھے پی ٹی آئی کی تمام ذمہ داریوں سے سبکدوش کردیا گیا ہے،اب کوئی مجھ سے بھیک نہ مانگے، جن لوگوں کیلئے لڑا تھا ان کے ذریعے عوام میں نظر انداز، ذلیل، رسوا اور بے عزت کیا گیا۔تفصیلات کے مطابق سوشل میڈیا پلیٹ فارم ایکس پر سلمان اقبال نامی ایک صارف نے شیر افضل مروت سے کہا کہ مجھے ایک بات سمجھ نہیں آتی یہ قیادت کیا کررہی ہے؟ کیا ہم نے عمران خان کو فرعونوں کے آسرے پر چھوڑ دیا؟ کیا یہ قیادت ہمارے ساتھ اور عمران خان کے ساتھ اللہ نہ کرے دھوکہ تو نہیں کررہی؟ ،عوام نے آپ سمیت اس قیادت کو ووٹ اس لئے دیا تھا کے آپ لوگ خان کیلئے کچھ ایسا کریں گے جس سے خان کچھ دن میں باہر آجائیں گا لیکن ایسا کچھ نظر نہیں آرہا۔
اس ٹوئٹ کے جواب میں شیر افضل مروت نے کہا کہ پارٹی نے مجھے میری تمام ذمہ داریوں سے فارغ کر دیا ہے، واضح طور پر یہ خان صاحب کی ہدایات کے تحت کیا گیا ہے۔انہوں نے کہا کہ میرے پاس کوئی ذمہ داری نہیں ہے ،میں نے فیصلہ کیا ہے کہ میں اپنے وقت کو اپنی مرضی کے مطابق گزاروں گا، میں نے اپنی ساری زندگی ایسے ہی گزاری ہے جیسے اب آپ مجھے دبئی میں دیکھ رہے ہیں۔شیر افضل مروت نے واضح کیا کہ کوئی بھی مجھ سے فرائض کی بھیک مانگنے کی توقع نہ رکھے کیونکہ میری عزت نفس مجروح ہوئی ہے اور میں اس پر کبھی سمجھوتہ نہیں کروں گا چاہے مجھے پارٹی سے نکال دیا جائے۔
انہوں نے کہا کہ میں تسلیم کرتا ہوں کہ میں کچھ خاص حالات میں تھوڑا سا غیر معمولی اور نفسیاتی ہوں، تمام چیزوں میں، عزت نفس میری ترجیحات کی فہرست میں سرفہرست ہے، ایک بار جن لوگوں کیلئے میں لڑا تھا ان کے ذریعے عوام میں نظر انداز، ذلیل، رسوا اور بے عزت کیا گیا۔انہوں نے کہا کہ کوئی مجھے یہ نہ بتائے کہ کیا کرنا چاہیے اور کیا نہیں کرنا چاہیے۔انہوں نے اپنے کہا کہ میں کسی بھی سرگرمی میں اس وقت تک حصہ نہیں لوں گا جب تک کہ مجھے ثابت نہیں کیا جاتا اور خان صاحب خود مجھے ڈیوٹی نبھانے کیلئے نہیں کہتے۔
