اسلام آباد (نیوز ڈیسک) وزیراعظم شہباز شریف نے کہا ہے کہ کرغزستان سے جو طلبا پاکستان آنا چاہیں، سرکاری خرچ پر ان کی فوری واپسی یقینی بنائیں گے ، طلبہ اور والدین کے درمیان رابطے کےلیے سفارتخانہ کو بھی ہر قسم کی معاونت فراہم کرنے کی ہدایت کردی تاہم بشکیک میں موجود ٹک ٹاکر و ڈاکٹر عالیہ شعیب نے دعویٰ کیا ہے کہ جو طلباء پاکستان پہنچے ہیں، وہ اپنے ٹکٹ پر آئے ہیں۔
اپنے ایک ویڈیو بیان میں ڈاکٹرعالیہ نے بتایا کہ ’ہمیں یہاں پر پاکستان کی طرف سے آنیوالی مفت پروازوں کے بارے میں کوئی معلومات نہیں، جو طلباء یہاں سے پاکستان پہنچ چکے ہیں، وہ یونیورسٹی کی پروازوں پر ہی پہنچے ہیں جن کی ادائیگی کی گئی تھی ، طلباء نے اپنے ٹکٹ کی ادائیگی کی ، اس کے بعد وہ لوگ اپنے گھروں کو جارہے ہیں لیکن ہمیں مفت پروازیں نہیں ملیں‘۔ادھر نجی ٹی وی کے مطابق خصوصی طیارہ 130پاکستانی طلبہ کو لیکر پاکستان پہنچے گا، وزیراعظم کی ہدایت پر خصوصی طیارے کے تمام تراخراجات حکومت پاکستان ادا کرے گی۔
