اسلام آباد (این این آئی)پبلک اکاونٹس کمیٹی چیئرمین کے معاملے پر شبلی فرازاورشیرافضل مروت آمنے سامنے آگئے۔اپوزیشن لیڈر ایوان بالا شبلی فراز نے کہا کہ چیئرمین پبلک اکاونٹس کمیٹی پنجاب سے ہوناچاہیے، اس کے لئے سابق چیئرمین پی ٹی آئی نے صاحبزادہ حامد رضاکانام دیا ہے، تاہم اس معاملے سے متعلق صورتحال ایک،2 دن تک مزید واضح ہوجائے گی۔

انہوں نے کہاکہ چیئرمین پبلک اکاونٹس کمیٹی کے حوالے سے کنفیوژن اسپیکر کی جانب سے پیدا کی گئی ہے۔دوسری جانب شیر افضل مروت نے شبلی فراز سے بیان واپس لینے کا مطالبہ کر دیا ہے ، شیر افضل مروت نے کہا کہ شبلی فراز غلط بیانی کررہے ہیں،سابق چیئرمین پی ٹی آئی نے پبلک اکاونٹس کمیٹی کیلئے کسی اور کا نہیں ،میرانام دیا ہے۔انہوںنے کہاکہ شبلی فرازکے مطابق حامدرضاکانام دیاہے تویہ ان کی ذاتی خواہش ہے، سابق چیئرمین پی ٹی آئی نے کبھی حامدرضاکانام نہیں لیا۔