واشنگٹن (اے این این)آئی ایم ایف نے کہاہے کہ پاک چین راہداری منصوبہ پاکستان کی اقتصادی ترقی کےلئے بہت اہمیت کا حامل ہے ، منصوبے سے بھرپور فائدہ اٹھانے کے لیے پاکستان کو فنڈز کی فراہمی اور مانیٹرنگ کی بھی ضرورت ہے۔ واشنگٹن سے خصوصی انٹرویو میں آئی ایم ایف کے ہیڈ آف مشن برائے پاکستان ہیرالڈ فنگر نے بتایا کہ اصلاحات اور کاروبار دوست ماحول کے ذریعے پاکستان اپنی مسابقت بہتر کر سکتا ہے۔ان کا کہنا تھا کہ پاک چین اقتصادی راہداری منصوبے میں شامل انفرا سٹرکچر پراجیکٹس کو ترجیح دی جائے اور رقم کی فراہمی کو بہتر طریقے سے مانیٹر کیا جائے گا۔انھوں نے مزید کہا کہ منصوبے کی کامیاب تکمیل کے لیے ترجیحات کا تعین ، جانچ پڑتال ، لاگت کا صحیح اندازہ لگانا اور بہتر مالیاتی نظام کی ضرورت ہے اس کے علاوہ حکومت پاک چین منصوبے کےلئے فنڈنگ مجموعی بجٹ کے اندر رہ کے کی جائے اور راہداری سے منسلک پاور پراجیکٹس کے معاہدے اس طرح ہوں کے جس سے بجٹ اہداف متاثر نہ ہوں۔