راولپنڈی (این این آئی)پاکستان تحریک انصاف کے رہنما اور سابق اسپیکر قومی اسمبلی اسد قیصر نے کہا ہے کہ ہمارے وزیراعظم کے امیدوار عمر ایوب ہوں گے ،اسپیکر خیبرپختونخوا اسمبلی کے امیدوار عاقب خان ہوں گے۔اڈیالہ جیل کے باہر پی ٹی آئی کے بانی عمران خان سے ملاقات کے بعد بیرسٹر سیف کے ہمراہ میڈیا سے بات کرتے ہوئے اسد قیصر نے کہا کہ پارٹی کے سیکریٹری جنرل عمر ایوب کو وزیراعظم کے لیے نامزد کر رہے ہیں، امید ہے قومی اسمبلی میں ہمارا وزیراعظم آئیگا۔
انہوں نے کہا کہ اسمبلی میں بیٹھ کر قانونی جنگ لڑیں گے، بچہ بچہ جانتا ہے کہ پی ٹی آئی کا مینڈیٹ چوری کیا گیا، تمام سیاسی جماعتوں کے ساتھ بات کرنے کا ٹاسک دیا گیا ہے۔اسد قیصر نے کہا کہ الیکشن میں ہمارے مینڈیٹ کو چوری کیا گیا، پاکستان کی تاریخ کا سب سے بدترین الیکشن ہوا، تمام سیاسی صورتحال بانی پی ٹی آئی کے سامنے رکھی۔انہوںنے کہاکہ دھاندلی کے خلاف احتجاج کرنے والی جماعتوں سے رابطہ کریں گے۔
