اسلام آباد (این این آئی)سپریم کورٹ نے توشہ خانہ کیس کی سماعت کا تحریری حکمنامہ جاری کر دیا ہے جس میں کہاگیاہے کہ چیئرمین پی ٹی آئی جیل میں کس حال میں ہیں اٹارنی جنرل 28 اگست تک رپورٹ دیں۔
دو صفحات پر مشتمل حکم نامہ چیف جسٹس سپریم کورٹ عمر عطا بندیال نے تحریر کیا۔تحریری حکمنامے میں عدالت نے کہا کہ چیئرمین پی ٹی آئی جیل میں کس حال میں ہیں اٹارنی جنرل 28 اگست تک رپورٹ دیں، اٹارنی جنرل چیمبر میں رپورٹ جمع کرائیں۔حکمنامے میں کہا گیا کہ درخواست گزار کے وکیل نے بتایا ہائیکورٹ میں توشہ خانہ کیس زیر سماعت ہے، وکیل نے سپریم کورٹ کے حکم پر گزشتہ روز اٹھائے گئے نکات ہائیکورٹ میں پیش کیے۔سپریم کورٹ نے حکم نامے میں کہا کہ اس صورتحال میں اسلام آباد ہائیکورٹ کے فیصلے کا انتظار کرنا مناسب ہوگا۔
چیف جسٹس نے تحریری حکم نامہ میں کہا کہ درخواست گزار کے وکیل کے مطابق انہوں نے تمام نکات ہائی کورٹ میں پیش کر دیے ہیں، ایسی صورت حال میں اسلام آباد ہائیکورٹ کے فیصلے کا انتظار کرنا مناسب ہو گا، کیس کی سماعت ملتوی کی جاتی ہے۔
