اسلام آباد (این این آئی)چیف آرگنائزر مسلم لیگ (ن) مریم نواز کو شوگر ملز کیس میں سپریم کورٹ سے بڑا ریلیف مل گیا،عدالت عظمیٰ نے نیب کی جانب سے مریم نواز کی ضمانت منسوخی کی درخواست واپس لینے کی بنا پر خارج کر دی۔
منگل کو چیف جسٹس عمرعطا بندیال کی سربراہی میں تین رکنی بنچ نے مریم نواز کی ضمانت منسوخی کی نیب کی درخواست پر سماعت کی۔قومی احتساب بیور نے مریم نواز کی ضمانت منسوخی کی درخواست واپس لے لی۔ نیب نے عدالت میں تحریری بیان جمع کراتے ہوئے موقف اختیار کیا کہ نیب ترامیم کے بعد اس کیس پر دائرہ اختیار باقی نہیں رہاخسپریم کورٹ نے درخواست واپس لینے کی بنیاد پر نمٹا دی۔چیف جسٹس عمر عطاء بندیال نے ریمارکس دیئے کہ درخواست واپس لینے کی بنیاد پر خارج کی جاتی ہے۔ نیب پراسیکیوٹر نے کہا کہ لکھا جائے کہ درخواست خارج کے بجائے آرڈر شیٹ میں نمٹا دی گئی۔
