اسلام آباد(این این آئی)اسٹیٹ بینک آف پاکستان (ایس بی پی)نے زرمبادلہ کے ذخائر پر اعلامیہ جاری کیا،گزشتہ ہفتے اسٹیٹ بینک کے پاس زرمبادلہ کے ذخائر میں 4ارب 20کروڑ ڈالرکا اضافہ ہوا۔اسٹیٹ بینک آف پاکستان نے زرمبادلہ کے ذخائر پر اعلامیہ جاری کیا ہے جس کے مطابق مرکزی بینک کے پاس زرمبادلہ کے ذخائر 8ارب 72کروڑ 72لاکھ ڈالر ہوگئے۔اسٹیٹ بینک کے اعلامیہ کے مطابق گزشتہ ہفتے میں پاکستان کو سعودی عرب سے 2ارب ڈالر اور انٹرنیشنل مانیٹری فنڈ (آئی ایم ایف)سے ایک ارب 20کروڑ موصول ہوئے۔اسٹیٹ بینک کا کہنا ہے کہ گزشتہ ہفتے متحدہ عرب امارات (یو اے ای)سے ایک ارب ڈالر موصول ہوگئے۔اسٹیٹ بینک کے مطابق زرمبادلہ کے مجموعی ذخائر 14ارب 65لاکھ ڈالر ہوگئے،کمرشل بینکوں کے پاس زرمبادلہ ذخائر 5ارب 33کروڑ 81لاکھ ڈالر ہیں۔