اسلام آباد(نیوزڈیسک) وزیر داخلہ چودھری نثار علی خان کی جانب سے جاری ایک اہم بیان میں کہا گیا ہے کہ سانحہ بڈھ بیر حملے کے ماسٹر مائنڈ کا تعلق افغانستان سے ہے جس کا سراغ لگا لیا گیا ہے اور اس کی تلاش جاری ہے۔ وزیر داخلہ کا کہنا تھا کہ بڈھ بیر میں تیرہ نہیں چودہ دہشت گرد مارے گئے تھے جن میں سے پانچ کی شناخت ہو گئی تاہم 9 حملہ آوروں کی شناخت نہیں ہو سکی۔ انہوں نے کہا کہ افغان حکام کو یہ شواہد دیں گے کہ سرغنہ افغانستان میں تھا۔ ہم نے اپنی سائیڈ کو کنٹرول کیا ہے۔ جنگجو دوسری طرف ہیں۔ وزیرداخلہ نے کہا کہ ادھر کوئی چھینک مارتا ہے تو الزام پاکستان پر لگتا ہے۔ بُرد باری کا مظاہرہ کرنا چاہیے۔ کسی دوسرے پر الزام نہیں لگانا چاہیے۔ وزیر داخلہ نے کہا کہ افغانستان کا نہ ہم نے قرضہ دینا ہے، نہ اس سے خائف ہیں اور نہ ہی اسے جوابدہ ہیں۔ انہوں نے کہا کہ پاکستان میں کھڑے ہو کر افغانستان میں آپریشن ہو سکتا ہے۔ مگر اس سے دونوں ملکوں کے تعلقات مزید خراب ہونگے۔