لاہور(این این آئی) سابق وزیر اعظم عمران خان کی اہلیہ بشری بی بی کی قریبی دوست فرح گوگی کے خلاف گوجرانوالہ میں ایک نقشے کی خلاف ورزی پر مقدمہ درج کرلیا گیا۔ پولیس کے مطابق مقدمے میں فرح گوگی کے شوہر احسن جمیل گجر کو بھی ملزم نامزد کیا گیا ہے۔
مقدمہ محکمہ گوجرانوالہ ڈیولپمنٹ اتھارٹی کے ڈپٹی ڈائریکٹر انفورسمنٹ کی مدعیت میں درج کیا گیا۔مقدمہ ایک ہاؤسنگ سوسائٹی میں منظور شدہ نقشے کی خلاف ورزی پر درج کیا گیا۔ایف آئی آر کے متن میں کہا گیا ہے کہ ہاسنگ سوسائٹی کے پبلک پارک کی جگہ غیرقانونی قبرستان بنا دیا گیا۔پارک اور کمرشل ایریا کا نقشہ تبدیل کر کے رہائشی پلاٹ بنائے گئے۔
سرکاری رہن شدہ پلاٹوں پر بھی غیر قانونی تعمیرات کروائی گئیں۔ایف آئی آر کے متن میں کہا گیا کہ بلڈرز کمپنی نے ہاسنگ سوسائٹی کے لئے1073 کنال اراضی کی منظوری لی۔پولیس کے مطابق فرح گوگی ہاؤسنگ سوسائٹی کی چیف ایگزیکٹو جبکہ احسن گجر ایک بلڈرز کے چیئرمین ہیں۔دوسری جانب گوجرانوالہ پولیس نے نجی ہاؤسنگ سوسائٹی کے دفتر پر چھاپہ مار کر وہاں موجود سوسائٹی کے 15ملازمین کو حراست میں لے لیا۔
