ممبئی(نیوز ڈیسک) بالی ووڈ کے کھلاڑی اداکار اکشے کمار کو فینز نے نظر انداز کرنا شروع کر دیا۔ بالی ووڈ اداکار اکشے کمار کا کہنا ہے کہ آن سے زیادہ لوگ ان کی بیگم کے پرستار ہیں اور مداحوں نے انھیں نظر انداز کرنا شروع کر دیا ہے۔ اس بات کا اظہار سماجی رابطے کی ایک ویب سائٹ پر ایک تصویر شیئر کر کے کیا، جس میں وہ اور آن کی اہلیہ ٹوئنکل کھنہ ایک بک اسٹور میں موجود ہیں، ٹوئنکل تو اپنے پرستار کو اپنی بیسٹ سیلنگ کتاب کی کاپی پر آٹو گراف دینے میں مصروف ہیں جبکہ اکشے سامنے بیٹھے اس منظر کو دیکھ رہے ہیں۔ اکشے نے اپنے پیغام میں لکھا “ایک پرستار کی جانب سے نظر انداز کیا گیا، جو ٹوئنکل کھنہ کا آٹو گراف لینا چاہتا ہے”۔ ساتھ ہی انھوں نے اس بات پر فخر کا اظہار کرتے ہوئے کہا، “ایسا آس وقت ہوتا ہے جب آپ کی بیگم ایک بیسٹ سیلنگ کتاب کی مصنف ہو”۔ ٹوئنکل نے بھی اسی تصویر کو دوبارہ سے پوسٹ کیا اور لکھا ” جب ایک بڑا اسٹار، ایک چھوٹے اسٹار کی کامیابی پر خوش ہوتا ہے”۔ اداکارہ سے مصنفہ کا سفر طے کرنے والی ٹوئنکل کھنہ نے گذشتہ ماہ 18 اگست کو اپنی کتاب “مسز فنی بونز” لانچ کی، جسے لوگوں نے بہت پسند کیا ہے۔ اکشے اور ٹوئنکل 2001 میں رشتہ ازدواج میں منسلک ہوئے اور ان کے 2 بچے ہیں۔