کراچی (این این آئی) محکمہ اوقاف سندھ کے افسران نے صوفی بزرگوں کے مزارات کی مرمت کیلئے مختص فنڈزکو بھی نہ بخشا۔تفصیلات کے مطابق سندھ کے مزارات کی مرمت اور دیکھ بھال کیلئے مختص فنڈز میں کروڑوں روپے کی مبینہ کرپشن کی تحقیقات کیلئے وزیراعلی سندھ کی انسپکشن ٹیم نے اوقاف سندھ کے افسران کے خلاف تحقیقات شروع کردی ہے۔ذرائع کے مطابق سچل سرمست کے مزار، تین ہٹی کراچی میں واقع نورعلی شاہ کے مزارکامرمتی فنڈز مبینہ طور پر افسران کی جانب سے ہڑپ کرلیا گیا۔ کنڈے شاہ کورنگی، غیب شاہ کے مزار کی بھی مرمت نہ ہوئی، لیکن فنڈز غائب ہے۔ذرائع کا کہنا ہے کہ سندھ کے مزارات کی مرمت اور دیکھ بھال کیلئے مختص فنڈز محکمہ اوقاف کے دفاتر کی مرمت بھی ہونا تھی، لیکن کوئی کام نہیں ہوا۔