اسلام آباد (این این آئی) پاکستان کی جانب سے عالمی مالیاتی بینک کو تحریری یقین دہانی کے لیے دوست ممالک سے رابطے جاری ہیں۔تفصیلات کے مطابق آئی ایم ایف سے قرض کے حصول کیلئے پاکستان نے تمام تر اقدامات کرلئے ہیں، تاہم تاحال آئی ایم ایف کی

جانب سے کوئی گرین سگنل نہیں ملااور روز نیا مطالبہ سامنے آجاتا ہے۔اب آئی ایم ایف نے 30جون تک فنانسنگ کرنیوالے ممالک سے تحریری یقین دہانی کرانے کی شرط رکھ دی ہے جس پر پاکستان نے آئی ایم ایف کو تحریری یقین دہانی کیلئے دوست ممالک سے رابطے شروع کردیئے ہیں۔حکام وزارت خزانہ کا کہنا ہے کہ پاکستان کی جانب سے سعودی عرب اور عرب امارات حکام سے باضابطہ طور پر دوبار رابطہ کیا گیا ہے اور دونوں ممالک نے جواب دینے کیلئے وقت مانگا ہوا ہے۔ذرائع کا کہنا ہے کہ وزیراعظم آفس، اور وزارت خزانہ حکام نے دونوں ممالک کے حکام سے رابطے کئے ہیں اور مزید رابطوں کا سلسلہ جاری ہے، امید ہے جلد مثبت جواب آئے گا۔حکام کا کہنا ہے کہ وزیراعظم آفس، وزارت خزانہ اور وزارت خارجہ بھی دوست ممالک سے رابطے میں ہے، حتمی جواب ملتے ہی آئی ایم ایف سے اسٹاف لیول معاہدے پر پیشرفت ہوگی۔