اسلام آباد (نیوز ڈیسک) معروف ٹک ٹاکر مسٹر پتلو کو قطر روانگی کے دوران دبئی ایئرپورٹ پر پولیس نے حراست میں لے لیا۔ اس حوالے سے ان کے دوست اور ٹک ٹاکر رجب بٹ نے تصدیق کی ہے، تاہم گرفتاری کی اصل وجہ اب رفتہ رفتہ واضح ہونا شروع ہوگئی ہے۔

یوٹیوبر حارث بھٹی کے مطابق، مسٹر پتلو کو ٹک ٹاک لائیو کے ذریعے سب سے زیادہ آمدنی حاصل کرنے والے ٹک ٹاکرز میں شمار کیا جاتا ہے۔ ان کی گرفتاری دبئی پولیس نے کی، جب وہ قطر کے ایک ایونٹ میں شرکت کے لیے جا رہے تھے۔ رجب بٹ نے انہیں قطر مدعو کیا تھا جہاں ایک مشہور ایپ کا خصوصی پروگرام منعقد ہونا تھا۔

حارث بھٹی نے مزید کہا کہ سوشل میڈیا پر مشہور شخصیات کے درمیان معمولی تنازعات اکثر شدت اختیار کر لیتے ہیں، اور بسا اوقات ان کے فینز جذبات میں آ کر انتقامی کارروائیاں کرتے ہیں۔ ایسا ہی کچھ مسٹر پتلو کے معاملے میں بھی ہوا۔ اطلاعات کے مطابق، کسی پچھلے تنازعے میں انہوں نے اپنے مداحوں کو اشارہ دیا تھا کہ کسی مخصوص فرد کو نشانہ بنایا جائے۔ مگر ان کے فالورز نے حد پار کرتے ہوئے اس شخص کی فیملی کی جعلی، مصنوعی ذہانت (AI) سے تیار کردہ، ویڈیوز بنا کر سوشل میڈیا پر پھیلادیں۔

اس اقدام پر متاثرہ فریق نے قانونی کارروائی کرتے ہوئے مسٹر پتلو کے خلاف مقدمہ درج کرا دیا، جس کی بنیاد پر دبئی میں انہیں گرفتار کر لیا گیا۔

مزید وضاحت کرتے ہوئے حارث بھٹی نے کہا کہ اصل ویڈیوز مسٹر پتلو نے خود تیار نہیں کیں، مگر ان کے پرستاروں کے غیر ذمہ دارانہ عمل نے انہیں اس مشکل میں ڈال دیا۔ اب وہ پولیس کی تحویل میں ہیں اور تفتیش جاری ہے۔