اسلام آباد (نیوز رپورٹ)وزیراعلیٰ پنجاب مریم نواز کے صاحبزادے جنید صفدر کی شادی کی ناکامی پر پہلی بار اُن لمحات کے گواہ فوٹوگرافر عرفان احسن نے پردہ اٹھایا ہے، جنہوں نے اس شادی کی تقریبات میں فوٹوگرافی کے فرائض انجام دیے تھے۔
واضح رہے کہ جنید صفدر اور عائشہ سیف کا نکاح 22 اگست 2021 کو لندن میں ہوا تھا، جس کے بعد دسمبر میں شادی کی رنگا رنگ تقریبات پاکستان میں منعقد کی گئیں۔ ان تقریبات میں جنید صفدر کی گائیکی اور مریم نواز کے دیدہ زیب ملبوسات نے خوب توجہ حاصل کی۔ تاہم، یہ ازدواجی رشتہ طویل عرصے تک قائم نہ رہ سکا اور اکتوبر 2023 میں دونوں نے خاموشی سے علیحدگی کا اعلان کر دیا۔
اس شادی کے اختتام کی وجوہات طویل عرصے تک ایک معمہ بنی رہیں، لیکن اب فوٹوگرافر عرفان احسن نے ایک پوڈکاسٹ میں گفتگو کے دوران اس تعلق کے ٹوٹنے کے پس پردہ محرکات پر روشنی ڈالی ہے۔ اُن کا کہنا تھا کہ وہ تقریب میں شریک ہونے کے بعد محسوس کر چکے تھے کہ یہ رشتہ زیادہ دیر قائم نہیں رہ سکے گا۔ اُن کے مطابق، شادی کی تقریبات میں ماحول اور باہمی رویے بہت کچھ واضح کر دیتے ہیں۔
عرفان احسن نے کہا، “جنید صفدر سے میری ملاقات نہایت خوشگوار رہی، وہ ایک شائستہ، بااخلاق اور مہذب نوجوان ہے۔ اُس نے خاص طور پر مجھ سے آ کر ملاقات کی، لیکن دلہن کے خاندان کی جانب سے ایک واضح فاصلہ اور اجنبیت کا احساس ہو رہا تھا، جیسے وہ خود کو اس ماحول میں مکمل طور پر ہم آہنگ نہیں کر پا رہے ہوں۔”
فوٹوگرافر نے مزید کہا کہ شریف خاندان کے ساتھ ان کا تجربہ نہایت مثبت رہا۔ مریم نواز اور ان کے اہل خانہ نے ان کے ساتھ محبت اور عزت سے پیش آیا، اُن کی مہمان نوازی مثالی تھی۔
جب یہ گفتگو سوشل میڈیا پر وائرل ہوئی تو صارفین نے مختلف انداز میں ردِ عمل دیا۔ کئی افراد کا کہنا تھا کہ “بعض اوقات خوبصورت تصویروں کے پیچھے چھپی حقیقت بہت پیچیدہ اور دلخراش ہوتی ہے۔”
