اسلام آباد (نیوز ڈیسک) پاسپورٹ بنوانے کے خواہشمند شہریوں کے لیے اہم سہولت کا اعلان کیا گیا ہے، جس کے تحت ملک بھر میں پاسپورٹ دفاتر کے اوقات کار دوبارہ تبدیل کر دیے گئے ہیں۔
ڈائریکٹوریٹ جنرل امیگریشن اینڈ پاسپورٹس کے مطابق عوامی سہولت کو مدنظر رکھتے ہوئے فیصلہ کیا گیا ہے کہ اب تمام پاسپورٹ دفاتر ہفتے میں پانچ دن کھلے رہیں گے۔ اس کے تحت ملک بھر کے فیلڈ دفاتر اور پاسپورٹ مراکز پیر سے جمعہ تک معمول کے مطابق اپنی خدمات فراہم کریں گے۔یاد رہے کہ اس سے قبل مشرق وسطیٰ میں کشیدگی اور توانائی کے ممکنہ بحران کے پیش نظر وزیراعظم شہباز شریف کی کفایت شعاری پالیسی کے تحت سرکاری اداروں کے کام کے دن کم کر کے چار کر دیے گئے تھے۔ اس دوران سرکاری دفاتر کے تقریباً 50 فیصد عملے کو گھر سے کام کرنے کی اجازت بھی دی گئی تھی۔
تاہم اب شہریوں کو پاسپورٹ کے حصول میں پیش آنے والی مشکلات کو کم کرنے کے لیے سابقہ شیڈول بحال کر دیا گیا ہے تاکہ درخواست گزاروں کو بہتر سہولت فراہم کی جا سکے۔
محکمہ پاسپورٹ کے مطابق پاسپورٹ ہر پاکستانی شہری کا بنیادی حق ہے جو بیرون ملک سفر کے لیے ضروری قانونی دستاویز ہے اور بیرون ملک موجود پاکستانی سفارت خانوں کے ذریعے شہریوں کو تحفظ فراہم کرنے میں بھی اہم کردار ادا کرتا ہے۔
