اسلام آباد (نیوز ڈیسک) اسپین کی معروف اداکارہ آنا اوبریگون، جن کی عمر اب 70 برس ہے، نے انکشاف کیا ہے کہ انہوں نے اپنے انتقال کر جانے والے بیٹے کے محفوظ کردہ سپرم اور ڈونر انڈے کی مدد سے 68 سال کی عمر میں ایک بچی کو جنم دیا، جو ان کی پوتی کہلاتی ہے۔
آنا کا بیٹا الس لیقیو 27 سال کی عمر میں کینسر کے باعث وفات پا گیا تھا، اور اپنی بیماری کے دوران ہی اس نے اپنا سپرم محفوظ کروا لیا تھا۔ آنا کے مطابق، بیٹے کی موت کے بعد وہ تین سال تک جیسے “زندہ لاش” بن کر رہ گئی تھیں، تاہم اب ننھی انیتا کی آمد نے ان کی زندگی میں نئی خوشیاں بھر دی ہیں۔
انہوں نے اپنی پوتی کی پہلی سالگرہ کے موقع پر سوشل میڈیا پر ایک جذباتی پیغام شیئر کرتے ہوئے کہا، “تم بالکل اپنے والد جیسی لگتی ہو، اور تم نے میرے دل کو ایک بار پھر روشنی دے دی ہے۔”
اسپین میں سروگیسی (کرائے کی کوکھ) غیر قانونی ہے، اسی لیے آنا نے یہ عمل امریکہ میں مکمل کروایا۔ ان کے اس فیصلے پر کچھ تنقید بھی ہوئی، تاہم بہت سے لوگوں نے ان کے اس جذبے اور ماں کے طور پر ان کے حوصلے کو سراہا۔
آنا اوبریگون نے عندیہ دیا ہے کہ وہ مستقبل میں مزید بچوں کے بارے میں بھی سوچ سکتی ہیں، کیونکہ ان کے بیٹے الس کی خواہش تھی کہ اس کے پانچ بچے ہوں۔ ان کا کہنا تھا کہ انیتا کی موجودگی نے ان کے ٹوٹے ہوئے دل کو سہارا دیا ہے، اور اب وہ خود کو پھر سے جینے کے قابل محسوس کر رہی ہیں۔
