لاہور (این این آئی)قومی کرکٹ ٹیم کے سابق کپتان بابر اعظم کی اے ایس پی شہربانو کے ساتھ آئی ننھی بچی کو آٹو گراف دینے کی ویڈیو سوشل میڈیا پر وائرل ہورہی ہے جس کے بارے میں دعویٰ کیا جارہا ہے کہ یہ خاتون پولیس افسر کی بیٹی ہے۔یہ ویڈیو 26 فروری کی ہے لاہور کے قذافی اسٹیڈیم میں پی ایس ایل کے تیرہویں میچ میں پشاور زلمی نے اسلام آباد یونائیٹڈ کو 8 رنز سے شکست دی تھی۔

پشاور زلمی نے پہلے کھیلتے ہوئے 5 وکٹ کے نقصان پر 201 رن بنائے تھے، اس دوران بابر اعظم نے 63 گیندوں پر 111 رنز شاندار اننگز کھیلی تھیں، جس میں دو چھکے اور 14 چوکے شامل ہیں۔میچ کے بعد بابر اعظم نے اپنے مداحوں سے ملاقات کی اور انہیں آٹوگراف بھی دئیے۔اس دوران ان کی اے ایس پی شہر بانو سے ملاقات ہوئی، ویڈیو میں دیکھا جاسکتا ہے کہ بابر اعظم پہلے ننھی مداح کو گود میں اْٹھاتے ہیں اور پھر انہیں آٹوگراف دیتے نظر آ رہے ہیں، سوشل میڈیا پر دعویٰ کیا جارہا ہے کہ ننھی بچی اے ایس پی شہر بانو کی بیٹی ہے۔