اسلام آباد(مانیٹرنگ ڈیسک)سعودی عرب میں 8سالہ بچہ اور اس کی 12سالہ بہن خاندان کی مالی ضروریات پوری کرنے کیلئے میدان میں آگئے، ایک ریال میں بہن کی بنائی ڈرائنگ فروخت کرتے الیاس کی تصاویر نے سب کو حیران کر دیا۔

تفصیلات کے مطابق سعودی عرب میں مقیم انڈونیشین خاندان کے کم عمر بچوں نے خاندان کی کفالت کی غرض سے میدان میں اترتے ہوئے ایسا کام شروع کر دیا جس نے سننے اور دیکھنے والوں کو حیران کر دیا ہے، انٹرنیٹ پر وائرل ہوتی 8سالہ الیاس کی اپنی بہن کی بنائی ڈرائنگز فروخت کرتی تصاویرکو بے حد سراہا گیا ہے۔ جدہ ایسوسی ایشن برائےثقافت اورکلچر نے الیاس اور اس کے خاندان کیلئے خصوصی تقریب کا انعقاد کیا جس میں دونوں بہن بھائیوں کو تحائف اور عطیات سے نوازا گیا ہے۔ مالی تنگی کے باعث 8سالہ الیاس اور اس کی بہن نے اپنے خاندان کی مالی ضروریات میں ہاتھ بٹانے کا سوچا اور12سالہ یسریٰ نے بھائی کو ڈرائنگز بنا کر دینا شروع کر دیں، بہن کی بنائی ڈرائنگ لیکر بغل میں ایک پرانی چادر داب کر 8سالہ الیاس جدہ میں ایک پل تلے بیٹھ کر ان ڈرائنگز کو فروخت کرنے لگ گیا۔سعودی گزٹ میں شائع تفصیلات کے مطابق ایک مقامی شہری نے الیاس کی ڈرائنگ فروخت کرتی تصویر کھینچ کر سوشل میڈیا پر اپ لوڈ کردیں جنہیں بہت پذیرائی حاصل ہوئی۔جدہ ایسوسی ایشن برائےثقافت اورکلچرکےسربراہ عمرالجسار کاکہناہے کہ یہ تصویر دیکھ کرہم سب بہت حیران ہوئے اور ہم نےڈرائنگز فروخت کرتے اس بچے کی تلاش شروع کردی،الیاس اور اس کی باصلاحیت بہن کی داستان متاثرکن ہے۔ان دونوں بہن بھائیوں اور ان کے خاندان کوہماری مددکی ضرورت ہے۔ہم اپنی زندگیوں میں اس قدر مصروف ہیں کہ ہم بھول جاتے ہیں کہ کسی کو ہماری مددکی ضرورت ہے۔‘‘

موضوعات:جدہ جدہ ایسوسی ایشن برائےثقافت وکلچر ڈرائنگز