کراچی ( این این آئی) پاکستان کرکٹ ٹیم کے ہنس مکھ فاسٹ بولرشاہنوازدھانی نے بولنگ کوچ شان ٹیٹ کو جذباتی الوداع کہا جو سیریزمیں شکست کے بعد نیوزی لینڈ ٹیم کے ساتھ واپس روانہ ہوچکے ہیں۔

پاکستان کو جمعہ کے روز نیوزی لینڈ کے خلاف ہوم گرائونڈ پر 2-1 سے سیریز میں شکست کا سامنا کرنا پڑا تھا جس کے بعد کوچ ثقلین مشتاق اور ان کی ٹیم کی مدت ملازمت بھی ختم ہوچکی ہے۔دھانی نے ٹوئٹرپرشان ٹیٹ کے ساتھ دلکش تصاویرشیئرکرتے ہوئے ان سے اپنی جذباتی وابستگی کا اظہارکیا۔فاسٹ بالرنے اپنی ٹویٹ میں دل شکستہ ایموجی کے ساتھ لکھا کہ مسکراہٹیں لانے والا ایک دوست، گزشتہ رات آنکھوں میں آنسو چھوڑ کر چلا گیا۔ پاکستان کرکٹ بورڈ کے ساتھ بطوربولنگ کوچ شان ٹیل کا کنٹریکٹ 9 فروری کو ختم ہو رہا ہے۔ اس لحاظ سے پاکستان اور نیوزی لینڈ کے درمیان سیریز ان کی آخری سیریز تھی۔پاکستان کرکٹ بورڈ کی مینجمنٹ کمیٹی کے سربراہ نجم سیٹھی فی الحال شان ٹیٹ کے کنٹریکٹ کی تجدید پرغور نہیں کررہے ہیں۔یاد رہے کہ نیوزی لینڈ نے پاکستان کے خلاف ون ڈے سیریز دو ایک سے جیتی ہے۔

موضوعات:شاہنواز دھانی