لاہور (مانیٹرنگ ڈیسک) پولیس نے خاتون اول بشریٰ بی بی کے بیٹے کو گرفتار کر لیا، ڈان نیوز کے مطابق پولیس نے بشریٰ بی بی کے چھوٹے بیٹے محمد موسیٰ مانیکا، اس کے کزن محمد احمد مانیکا جو کہ ن لیگ کے ایم این اے احمد رضا مانیکا کا بیٹا ہے اور ایک دوست احمد شہر یار

کو شراب رکھنے کے الزام میں گرفتار کر لیا ہے، تینوں کے خلاف ایف آئی آر درج کر لی گئی ہے، ایف آئی آر کے مطابق، غالب مارکیٹ پولیس نے پیر کی صبح ان کی کار سے شراب برآمد کی تھی اور محمد موسیٰ مانیکا، کزن محمد احمد مانیکا اوران کے ایک دوست احمد شہریار کے خلاف مقدمہ درج کیا تھا۔تینوں مشتبہ افراد کے خلاف ایف آئی آر دی پروہیبیشن (انفورسمنٹ آف حدڈ آرڈر، 1979) کی ذیلی دفعہ 3، 4، اور 11 کے تحت درج کی گئی تھی جنہیں ظہور الٰہی روڈ پر پولیس چوکی عبور کرتے ہوئے گرفتار کیا گیا تھا۔ہسپتال میں معائنے کے دوران شہر یار نشے میں دھت پایا گیا۔ موسیٰ مانیکا اورمحمد احمد مانیکا کو بعد میں مانیکا خاندان کے ایک شخص کی ذاتی ضمانت پر رہا کیا گیا کیونکہ انہوں نے اس وقت شراب نہیں پی رکھی تھی، شہریار نے عدالت سے ضمانت حاصل کر لی ہے۔ پولیس نے برآمد شدہ شراب کے نمونے فرانزک تجزیہ کے لیے بھیج دیے ہیں۔

موضوعات:بشریٰ بی بی