کوئٹہ( این این آئی) پاکستان مسلم لیگ(ن) کے صدروقومی اسمبلی میں اپوزیشن لیڈر میاں محمد شہباز شریف نے کہا ہے کہ نا اہل حکمران اپوزیشن جماعتوں کو دیوار سے لگانے کی کوششوں میں مصروف ہے جس کے خطرناک نتائج برآمد ہونگے حکمرانوں کی غلط پالیسیوں کی بدولت ملک سنگین بحرانوں سے دوچار ہے مسلم لیگ ہی ملک کو موجودہ بحرانوں سے نکالنے کی صلاحیت رکھتی ہے ،

بلوچستان کا اگلے ماہ دورہ کروں گا اس موقع پر بلوچستان کی اہم سیاسی و قبائلی شخصیات پارٹی میں شمولیت کا اعلان کریں گی۔ یہ بات انہوں نے جمعہ کو مسلم لیگ(ن) بلوچستان کے سیکرٹری اطلاعات نصیرخان اچکزئی ،سینئر نائب صدر ملک ظاہر کی قیادت میں ملاقات کرنے والے وفد سے بات چیت کرتے ہوئے کہی اس موقع پر مسلم لیگ(ن) کی ترجمان مریم اورنگزیب،احسن اقبال اوردیگر رہنمابھی موجود تھے اس موقع پر نصیرخان اچکزئی نے مسلم لیگ(ن) کو بلوچستان میں فعال اور منظم بنانے کیلئے اٹھائے جانے والے اقدامات کے بارے میں تفصیلی طور پر آگاہ کیا۔میاں شہباز شریف نے کہا کہ حکومت کی آمرانہ روش نے پارلیمان کو اکھاڑا بنادیا ہے جو افسوسناک اور قابل مذمت ہے حکومت کی جانب سے حالیہ دنوں کی جانے والی قانون سازی پارلیمنٹ، آئین اور عوام سے سنگین مذاق ہے۔انہوں نے کہا کہ پی ٹی آئی کی نااہلی کی وجہ سے ملک بحرانوں کا شکار ہے عام آدمی سے لیکر صنعتکار تک پریشان ہے، آٹا، چینی، پیٹرولیم مصنوعات اور ڈالر بحران سے خان صاحب کے اے ٹی ایمز کو فائدہ پہنچایا گیا، اوورسیز پاکستانیوں کو ووٹ کا حق دینے والوں سے پاکستانی عوام سوال کررہے ہیں کہ ہمیں ووٹ کا حق کب دینگے۔انہوں نے کہا کہ مسلم لیگ(ن) ہی وہ واحد جماعت ہے جو ملک کو موجودہ بحرانوں سے نکالنے کی صلاحیت رکھتی ہے اورانشاء اللہ عوام کے ووٹوں کی

طاقت سے پارٹی اقتدارمیں آکر پارٹی عوام کو موجودہ بحرانوں سے نجات دلائے گی۔ میاں شہباز شریف نے کہا کہ وہ اگلے ماہ بلوچستان کا تفصیلی دورہ کریں گے اور پارٹی کی فعالیت کے حوالے سے اہم فیصلے کئے جائیں گی اور الیکشن سے قبل اہم سیاسی و قبائلی شخصیات مسلم لیگ(ن) بلوچستان میں شمولیت کا اعلان کریں گی۔

موضوعات:شہباز شریف